የወሳኝ ኩነቶች ምዝገባ ኤጀንሲ ለማቋቋም የአማራ ክልል መስተዳድር ምክር ቤት ደንብ አወጣ

የአማራ ክልል መስተዳድር ምክር ቤት የካቲት 7/2006 ዓ.ም ባካሄደው 4ኛ ዓመት 15ኛ መደበኛ ስብሰባ ላይ የወሳኝ ኩነቶች ምዝገባ ኤጀንሲን ማቋቋሚያ ደንብ አውጥቷል።

መስተዳድር ምክር ቤቱ ጉዳዩ ሠፊ ትንታኔ እና እይታ ይኖረው ዘንድ ረቂቅ አጀንዳውን ለህግና አስተዳደር ቋሚ ኮሚቴ በመምራት ከፍተኛ ምክክር ከተደረገበት በኋላ ነው በዚሁ እለት ቋሚ ኮሚቴው የደረሰበትን የውሳኔ አስተያየት በንባብ ከሰማ በኋላ ውሳኔ ያሳለፈው።

ቋሚ ኮሚቴው ደንቡ የፌድራል ወሳኝ ኩነቶች ምዝገባ ኤጀንሲ ማቋቋሚያ አዋጅን መሠረት በማድረግ ክልላዊ ባህሪይ እንዲኖረው ተደርጐ የተዘጋጀ መሆኑና ክልሉ ካለው ስፋትና የህዝብ ብዛት አንፃር ኩነቶችን ማለትም ከልደት፣ ከጋብቻ፣ ከፍች እና ከሞት እንዲሁም ከሌሎች ኩነቶች ጋር በተያያዘ የምዝገባ ሥራ በተደራጀ መንገድ በመስራት ዋነኛ የመረጃ ምንጭ በመሆን የክልሉ ህብረተሰብ በኢኮኖሚ፣በማህበራዊና ለፍትህ አስተዳደሩ አጋዥ እና ጠቃሚ የሚሆንበትን ምቹ ሁኔታ መፍጠር የሚያስችል ዓላማ ያለዉ መንግስታዊ ተቋም እንዲኖር ማድረግ አስፈላጊ የልማት አጋዥ መሆኑን አመላክቷል።

መስተዳድር ም/ቤቱም በጉዳዩ ላይ ሠፊ ውይይት፣ ጥያቄና መልስ በማድረግ በደንቡ መውጣት ላይ በመስማማት የክልሉ ውሳኝ ኩነቶች ምዝገባ በኤጀንሲ ደረጃ ራሱን ችሎ እንዲቋቋምና ተጠሪነቱም ለፍትህ ቢሮ እንዲሆን ወስኗል።

በተጨማሪ ኤጀንሲው ምክር ቤት እንዲኖረው ማድረግ አስፈላጊ መሆኑ ተመልክቷል። የቦርድ አባላቱም የፍትህ ቢሮ ኃላፊ፣ የርዕሰ መስተዳድር ጽ/ቤት ኃላፊ የኤጀንሲው ዳይሬክተር እና ሌሎች የሚመለከታቸው ምክትል ቢሮ ኃላፊዎች እንዲሆኑ ተወስኗል።

 

የአማራ ክልል መስተዳድር ምክር ቤት የክልሉን የ2006 በጀት ዓመትየመጀመሪያ መንፈቅ ዓመት የልማት እና መልካም አስተዳደር እቅድ አፈፃፀም ገመገመ

የአማራ ክልል መስተዳድር ምክር ቤት የክልሉን የ2006 በጀት ዓመት የመጀመሪያ መንፈቅ ዓመት የልማት እና መልካም አስተዳደር እቅድ አፈፃፀም ገመገመ

መስተዳድር ምክር ቤቱ ጥር 27/2006 ዓ.ም ባካሄደው 4ኛ ዓመት የሥራ ዘመን 5ኛ አስቸኳይ ስብሰባ የክልሉ ካቢኔ በ2006 በጀት ዓመት የመጀመሪያው ግማሽ ዓመት የነበረው አፈፃፀም ምን ደረጃ ላይ እንዳለ በማወቅ ቀጣይ ባሉት ወራቶች ቀሪ ሥራዎችን በመለየት እና የጋራ ግንዛቤ በመፍጠር መፈፀም የሚቻልበትን ስልት መቀየስ ዋና ሥራ ነው በማለት አጀንዳውን የከፈቱት የክልሉ ርዕሰ መስተዳድር አቶ ገዱ አንዳርጋቸው ናቸው።

ይህ የ6 ወር እቅድ አፈፃፀም ሪፖርት በክልሉ ገንዘብ እና ኢኮኖሚ ልማት ቢሮ ተጠቃሎ የቀረበ ሲሆን ሪፖርቱም የእቅዱን መነሻ ሁኔታዎች፤ እቅዱን ለመፈፀም የተቀመጡ አቅጣጫዎችን፣ የዓመቱ ቁልፍ ተግባራት እቅድ አፈፃፀም በዝግጅት ምዕራፍና በትግበራ ምዕራፍ፣ የግማሽ ዓመቱ የልማትና የመልካም አስተዳደር ተግባራት እቅድ አፈፃፀም በዋና ዋና ሴክተሮች፣ የበጀት ዓመቱ የገቢ እና ወጭ አፈፃፀም ሁኔታ እንዲሁም የቀጣይ የትኩረት ነጥቦች የሚሉ መነሻ ሀሳቦችን መሠረት በማድረግ ዝርዝር ሪፖርቱን ያቀረቡት የክልሉ ገንዘብ እና ኢኮኖሚ ልማት ቢሮ ምክትል ኃላፊ አቶ ግርማ ተስፋዬ ናቸው።

መስተዳድር ምክር ቤቱም የቀረበውን ሪፖርት ግልጽነት እና አንኳር ጉዳዮች ላይ ማተኮሩን በጥንካሬ አይቶ፤ የታዩ ጥንካሬዎችን እና ክፍተቶችን ያመላከተ ነው፤ በመሆኑም ጥንካሬያችንን የበለጠ የምናጐለብትበት ክፍተታችንን የምንሞላበት ነው ሲል ም/ቤቱ አክሎ ገልጿል።

ሪፖርቱን መነሻ በማድረግ መስተዳድር ም/ቤቱ በኢኮኖሚ፣ በማህበራዊ እና መልካም አስተዳደር ተግባሮች አፈፃፀም ዙሪያ የተለያዩ ጥያቄዎችንና አስተያየቶችን በማንሳት ሠፊ ውይይት ካካሄደ በኋላ የቀጣይ 6 ወራት የትኩረት አቅጣጫዎችን አስቀምጧል።

ሰለሆነም የተለያዩ ተቋማት የግንባታ ሥራዎች ሀብትን በአግባቡ ያለመጠቀም፣ የመጓተት እና የጥራት ችግር ያለባቸው በመሆኑ ችግሮችን በመለየት መፍታት፤ በኢንቨስትመንት እና በኢንዱስትሪ ልማት ዘርፍ የተጀመሩ ተግባሮችን ማጠናከር፤ የማዕድን ዘርፍ የሥራ እድል የሚፈጥር እና ልማትን የሚያፋጥን በመሆኑ ከአደረጃጀት ጀምሮ በመፈተሽ ወደ ሥራ መግባት፣ ከመብራት ጋር ተያይዞ ያለውን ችግር ለመፍታት ትኩረት ሰጥቶ መስራት፤ የልማት ሠራዊት ግንባታ ጅማሮውን አጠናክሮ መቀጠልና ከፍተኛ አመራሩ ትኩረት ሰጥቶ ሁሉንም ተቋማት መደገፍ፣ ከግብርና አኳያ ያለው ጥንካሬ ወጥነት እንዲኖረው መረባረብ ይገባል ሲል በኢኮኖሚ ዘርፍ ያለውን የትኩረት አቅጣጫ ም/ቤቱ አመላክቷል።

ከዚህ ጋር ተያይዞ በማህበራዊ እና መልካም አስተዳደር ዙሪያም የፀረ-ኪራይ ሰብሳቢነት ትግሉን አጠናክሮ ለማስቀጠል በየደረጃው ያለው አመራር ትኩረት ሰጥቶ መስራት፤ ከፍትህ ቢሮ አኳያ ህግ የማስከበርና አቅም የመገንባት ሥራ በዋናነት መሠራት ያለባቸው ተግባሮች በመሆናቸው በፍትህ እና በህግ አስከባሪ አካላት መካከል ያለውን ቅንጅት ማጠናከር፤ ከጤና አንፃር አገልግሎቱን ለማሻሻል የደብረብርሃን ሆስፒታልና መሠል ተቋማትን ተሞክሮ ማስፋት፣ ሁለንተናዊ የጤና አፈፃፀም ለማሻሻል አመራሩ ሁሉንም ተቋማት የመከታተልናየመደገፍ ብቃቱን ማሻሻል፤ ከሳዑዲ አረቢያ ተመላሾችን በተመለከተ ሠራተኛና ማህበራዊ ጉዳይ ቢሮ ጉዳዩን በተደራጀ መልክ በመያዝ ከዞኖች ጋር መስራት፤ የትምህርት ጥራትን ለማረጋገጥ መሠራት ያለባቸው ሥራዎች ከአመራሩ ጀምሮ ያለውን ኃይል በንቃት በማሳተፍ እና በማጠናከር ሁሉም የሚመለከታቸዉ አካላት የሚፈለግባቸውን መወጣት እንዲችሉ ማድረግ የሚሉ የትኩረት ነጥቦች በምክር ቤቱ ቀርበው የጋራ መግባባት ተደርሶባቸዋል።


በአብክመ ርዕሰ መስተዳድር ጽ/ቤት

በህዝብ ግንኙነት ዋና የሥራ ሂደት የተዘጋጀ

 

Last Updated on Monday, 24 February 2014 11:09
 
Content View Hits : 514869

Comments

  • Hey! Someone in my Facebook group shared this webs...
  • Write more, thats all I have to say. Literally, it...
  • Amazing! This blog looks exactly like my old one! ...
  • Cսrrently it appears like Movable Type іs tɦe bеst...
  • Hi there, I enjoy reading through your post. I lik...

Who is online

We have 45 guests online

Entertainment